Boesman-Stories, Deel 3. Die boesman self, sy sedes, gewoontes en bekwaamhede
Boesman-Stories, Deel III voer die leser weg van die stories wat deur Boesmans self vertel is, en stel die Boesman nou kaal en bloot voor as mens van vlees en bloed. Die skrywer volg hom stap vir stap in sy tuiste en in die veld: as versorger van sy gesin, as kunstenaar, jagter en krygsman. Anders as die eerste twee dele is dít verhale ómtrent Boesmans, met die skrywer as verteller, en van meer wetenskaplike aard. Hoofstukke soos dié oor klipgereedskap en die opeenvolgende steen-, brons- en ystertydperke skakel die Boesman se leefwyse aan die vroegste geskiedenis van die mensdom.
Die werk se waarde lê in sy eenvoudige, opregte skryftrant wat die egtheid van die stof bewaar eerder as om dit met 'n vergulde nerfie te oortrek. Dit teken die persoonlikheid, sedes, gewoontes en bekwaamhede van 'n volk wat besig was om te verdwyn, en hou só 'n stuk inheemse geskiedenis en menslikheid vir die nageslag lewend.
How it begins
Hierdie slag het ons die eer om Deel III van “Boesman-Stories” in die hande van die Publiek te lê. Deel I het ons ’n insig gegee hoe flou die godsdienstige begrippe van die Boesman is; in Deel II is ons vergas geword op Stories wat enigsins die diepte van sy denkvermoë peil. Dus, tot sover het ons hom met ons verstand gevolg. Maar nou in hierdie Deel III en ook in Deel IV stel ons hom in sy eie natuur kaal en bloot voor die oë van die leser. Ons sal hom in sy tuiste en in die veld, as versorger van sy gesin en kunstenaar, as jagter en krygsman, stap vir stap op die hakke volg. Dus, ons wil nou met sy persoonlikheid en geaardheid kennis maak. Die eerste twee Dele is dus Stories deur Boesmans vertel; die volgende twee is Verhale omtrent Boesmans meegedeel. In die eerste geval was die outa as Storie-verteller aan die woord: in die laaste geval is die skrywer die verteller. Dus kan dit moontlik van ons verwag word dat ons ’n meer verhewe skryfstyl moet aanpas. Dog na ons beskeie mening sal ons afbreuk aan die egtheid van die materiaal doen om dit met ’n vergulde nerfie oor te blaas. Ons het nou eenmaal met ’n eenvoudige skryftrant begin: vergun ons dan ook om dit also te eindig.
Text from Project Gutenberg, public domain.